ТIорэлъ адыгабзэр, тэрэшI шэн-хабзэхэри

ТIорэлъ адыгабзэр, тэрэшI шэн-хабзэхэри

Гъэтхапэм и 14-м адыгабзэмрэ тхыбзэмрэ  я Мафэ хэдгъэунэфыкIыгъ. Хабзэ зэрэхъугъэу, ащ фэгъахьыгъэу тикъалэ Iофтхьэбзэ гъэнэфагъэхэр щызэрахьагъ. Ахэмэ  зэу ащыщ  лъэпкъ культурэм игупчэ  щырекIокIыгъэ зэхахьэу «Сиадыгабзэ сэ си дунай» зыфиоIорэр. Ащ  къыра-гъэблъэгъагъэх кIэлэегъаджэхэри  еджакIохэри. Зэхэхьэгъур рекIокIыным фэшI яшъыпкъэу Iоф дашIагъ Адыгэкъалэ лъэпкъ культурэм  игупчэ иIофшIакIохэм ыкIи артист цIыкIухэм.

ЗэIукIэр  къызэIуихыгъ ыкIи  гущыIэ фабэкIэ  къекIо-лIагъэхэм  къапэгъокIыгъ пчыхьэзэхахьэм изещакIоу ЖэнэлI Аминат. Тиныдэлъфыбзэ тикIасэу, тиадыгабзэ къызэтегъэнэжьыгъэным, хахъо ышIыным фэшI игъэкIотыгъэу  тызэрэдэлэжьэн фаер  ащ къыхигъэунэфыкIыгъ. Адыгабзэм гъогоу  къыкIугъэр, тхыбзэм лъапсэ фэзышIыгъэ просветитель  ыкIи тхэкIо цIэрыIохэр агу къыгъэкIыжьыгъ.

Ау  уадыгэмэ пшIэн фаер бзэ закъор арэп. Адыгэ усэхэри, орэдхэри,  къэшъуакIи, уихабзи, уитарихъи пшIэнхэ фае. Ари дэгъу дэдэу  артистхэм сценэм къыщыраIотыкIыгъ ыкIи къыщагъэлъэгъуагъ, Iофтхьабзэм яIахьышIу хашIахьыгъ, зэхахьэр лъэшъэу къагъэдэхагъ. Устэкъо Нухь, Хъут Алый,  Хьэкуамэ Тимур орэд дахэхэр  къаIуагъэх,  Къошк Имран адыгэ пщынэм жъынчэу къыригъэIуагъ.  Ныдэлъфыбзэм иIэшIугъэ къизыIотыкIырэ усэхэм  Iэшъынэ Аминэ,  Шъхьащэкъо Джамилэ, Пщыдатэкъо Тимур  къяджагъэх.

КIэлэцIыкIу театральнэ купэу «Жъогъобыным»  икъэ-гъэлъэгъонхэми къекIолIагъэхэр  гуапэ хагъуатэу еплъы-гъэх. «Нахьыжъым игъогу  зэпачырэп», «Цокъэжъымрэ цокъакIэмрэ», «Уз дэй» зыфиIорэ сценкэ гъэшIэгъонхэр къагъэлъэгъугъэх Тыгъужъ Аринэ,  ЖэнэлI Азидэ, Гъыщ Иринэ, ЛэупIакIэ Дамирэ, Тыгъужъ Хьазрэт, Iэшъынэ Аминэ. КIэлэцIыкIухэмэ дэгъоу агъэфедагъэх гущыIэжъхэри, гущыIэ щэрыохэри, IурыIупчъэхэри, адыгэ орэдыжъхэри,  шэн-хэбзэ дахэхэри зэIукIэм къекIолIагъэхэм агу къагъэкIыжьыгъ.    

КъэIогъэн фае, мы театральнэ студиеу «Жъогъобын» зыфиIорэм    кIэлэцIыкIухэм адыгабзэр  щызэрэгъашIэрэ къодыеп, лъэпкъым  итарихъ, икультурэ апэблагъэ мэхъух. Яныдэлъфыбзэ шIу зэрагъэлъэгъурэм пае рэзэныгъэ гущыIэхэр афэбгъазэ хъущт  купым ипащэу ЖэнэлI Аминати, усэхэр языгъашIэу Даур Хъэняти, лъэпкъ культурэм  иIофышIэхэу кIэлэцIыкIухэмэ Iоф адэзышIэхэрэм зэкIэми.
Кушъэхапхэм  шэн-хабзэу пылъыри шIуагъэу иIэри сценэм игъэкIотыгъэу къыщыраIотыкIыгъ  ХьэдэгъэлIэ Зухрарэ Дзэгъащтэ Эммэрэ.

– Лъэпкъ цIэрыIом урибзэшъ – ущыIэнэу, упсэунэу, дунаим ущызэлъашIэнэу тыпфэлъаIо, тиныдэлъфыбзэу тиадыгабз! - джащ фэдэ гущыIэхэмкIэ зэхахьэр зэфа-шIыжьыгъ.

Устэкъо Маргарит.