Спсэ къэгущыIэ

Спсэ къэгущыIэ

Хьакъунэ Заремэ Теуцожь районным къуаджэу Нэчэрэзые Хъуажъмэ яунэ къыщыхъугъ. Тхэныр зыригъэжьагъэр бэшIагъэ. Жанрэ зэфэшъхьафхэр ыгъэфедэхэзэ бзылъфыгъэ гум ихъыкIырэр къытхын ыкIи игупшысэхэр нэмыкIым лъигъэIэсынхэу къыдэхъу, сыда пIомэ ыгу зэIухыгъэу матхэ. Уахътэм къыгъэлъэгъуагъ тхэкIэ амал ин ащ зэрэIэкIэлъыр. Лирическэ усэхэмкIэ ригъэжьэгъагъэмэ, усэкIэ тхыгъэ прозэмкIэ кIотагъ, нэужым «ТызэрэшIэу тыжъугъэщх» зыфи-Iорэ тхылъым рассказ щхэнхэу къыдигъэхьагъэхэр еджагъэхэм лъэшэу агу рихьыгъ.

Зыныбжь икъугъэхэм зэрафатхэрэм имызакъоу, Заремэ кIэлэцIыкIу усэ гъэшIэгъонхэр етхых. Ащ ишыхьат «Ныбджэгъу къысфэхъу» зыфиIорэ тхылъыр. Ащ кIэлэцIыкIухэм ядунэе-еплъыкIэ зегъэушъомбгъугъэнымкIэ ишIуагъэ къэкIощт.

«Гур къыосэты» зыфиIорэ тхылъыр бзылъфыгъэ лирикэ закIэу зэхэлъ. Ащ Заремэ усэхэри поэмэхэри къыдигъэхьагъэх. Сабый цIыкIоу ным ышъо хэлъым ыгу щыхъэрэр гум къынегъэсы. Дунаим нахь уасэ зыфэтшIэу тет нэу тыкъэзгъэхъугъэм иIэшIугъэ къызэритхыхэрэм бэмэ уарегъэгупшысэ. Усэм икIочIэ лъэшкIэ шIулъэгъум илъэмыдж зэфэшъхьафхэм уарищэнэу усакIом къыдэхъу.

Мы яблэнэрэ тхылъэу «Спсэ къэгущыIэ» зыфиIорэу тхылъеджэмэ ядгъашIэ тшIоигъор 2017-рэ илъэсым ащ къыдигъэкIыгъ. Ар адрэхэм атекIы: ар поэмэ закIэу зэхэгъэуцуагъэ. ТхылъыкIэм философскэ мэхьанэ ин зиIэ поэмэхэр тхылъеджэхэм дагъотэщтых. Мафэ къэс дгъэпсэуалъэхэрэ пкъыгъо къызэрыкIохэу пIэкIорым, пхъэкIыпхъэм, кушъэм ыкIи нэмыкIхэм усакIом псэ къапигъэкIэн елъэкIы. Ахэм ядунае ухещэ, пкъыгъохэм нэмыкIы шъокIэ уарегъэплъы.
Джащ фэд шIулъэгъум, насыпым, бзылъфыгъэм, хъулъфыгъэм, ахэм зэфыщытыкIэу мы дунаим щыряIэм афэгъэхьыгъэ поэмэхэм гъэшIэгъонэу уахещэ. ЩыIэныгъэм инасып бзыхьафхэр уапашъхьэ гухьэрэ дахэхэу къырегъэуцох. Дэхагъэм, цIыфыгъэм, лъэпкъым иблэкIыгъэ ыкIи инеущырэ мафэ афэгъэхьыгъэ гумэкIыгъохэм усакIор анэсы, уарегъэгупшысэ, щыIэныгъэм укIигъэгушIун елъэкIы.

Заремэ иIэпэIэсэныгъэ псэр къыгъэгущыIэу шъуапашъхьэ къырелъхьэ, арышъ, еджэрэ пэпчъ мыщ ыгъэшIэгъон дигъотэнэу сыхаплъэ.

Жъажъый Сафиет.