МэфэкIым зеIэты

МэфэкIым зеIэты

Хэкужъым къэзыгъэзэжьыгъэм и Мафэ игъэкIотыгъэу шышъхьэIум и 1-м ти Адыгэ Республикэ щагъэмэфэкIыгъ.

ЗыкIыныгъэмрэ Зэгуры-Iоныгъэмрэ ясаугъэтэу Мыекъуапэ дэтым ыпашъхьэ щыкIогъэ зэхахьэм Адыгэ Республикэм и Правительствэ, Парламентым якъу-лыкъушIэхэр, къалэхэм, районхэм къарыкIыгъэхэр, Хэкужъым къэзыгъэзэжьыгъэ тилъэпкъэгъухэр, хьакIэу республикэм къэкIуагъэхэр, культурэм иIофышIэхэр, лъэпкъ Iофыгъохэм агъэгумэкIыхэрэр, ныбжьыкIэхэр хэлэжьагъэх.

Адыгеим и ЛIышъхьэу КъумпIыл Мурат ыцIэкIэ мэфэкIым хэлажьэхэрэм къафэгушIуагъ Адыгэ Республикэм IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.

1998-рэ илъэсым Косовэ къикIыжьыгъэхэ тилъэпкъэгъухэм я Хэкужъ къагъэзэжьынымкIэ Урысыем и Правительствэ, Адыгеим иапэрэ Президентэу Джарымэ Аслъан, республикэм икъулыкъушIэхэм зэхэщэн Iофыгъоу агъэцэкIагъэхэм мэхьэнэ ин зэряIэр Дж. Мырзэм хигъэунэфыкIыгъ.

Ятарихъ чIыгу зэзыгъэгъотыжьыгъэхэр Мэфэхьаблэ щыпсэухэзэ алъэ теуцожьыгъэх. Непэ ахэр IофшIэпIэ зэфэшъхьафхэм аIутых, еджэх, дзэм къулыкъур щахьы.

Лъэпкъым иджэныкъо машIо мамыр огум чIэтэу маблэ. Адыгэхэм заугъоижьынымкIэ республикэ общественнэ движениеу «Адыгэ Хасэр», нэмыкI общественнэ движениехэр Iофым чанэу хэлэжьагъэх.

Республикэм и Парламент и Комитет ипащэу Шэуджэн Тембот зэхахьэм къыщыгущыIагъ. Концертым хэлэжьагъэх ансамблэу «Мыекъуапэ инэфылъэхэр», артистхэу Хъут Рустам, Даутэ Сусанэ, ГъукIэлI Батыр, Хъурэнэ Азэ, Iэтэжьыкъо Фатимэ, Лъачэ Альберт ыкIи  нэмыкIхэри.

Пчыхьэзэхахьэм хэлэжьагъэх республикэм иапэрэ Президентэу Джарымэ Аслъан, Адыгеим ицIыф цIэрыIохэр. МэфэкIыр адыгэ джэгукIэ аухыгъ.

ЕмтIылъ Нурбый.